Esaki ta webpage ofishal di Departamentu di Hende Muhé Ministerial, enkargá ku tur esposa di pastor, esposa di ansiano, esposa di diákono, i yunan di pastor di nos dushi islanan Aruba, Bonaire i Curaçao.

Nos ta konsiente ku nos ta un grupo di peregrinonan privilegiá, RUMBO PA KAS, ku tin diferente reto i responsabilidatnan pekuliar na nos enkargo, kual Señor ta yama nos pa yuda kuné na fabor di Su iglesianan i gruponan di kreyente.

Nos ta peregrinonan den liderazgo, pero tambe peregrinonan ku mester tur dia di nobo di Dios Su Santu Spiritu pa duna nos e spiritu positivo, un mente na pas, i un kurason yen di goso pa sirbi ku amor, unda ku E yama i dirigí nos, i no lastrando pia.

Nos ta peregrinonan ku lo sostené nos esposo i tata den su ministerio. Peregrinonan ku tur dia di nobo ta empeñá pa buska Dios Su kara pa risibí kuminda spiritual fresku i aliento i forsa den orashon, pa nos por tin pa duna.

Ta un plaser pa kompartí e webpage aki ku boso, deseando ku kada revista, ku kada link i kada material por yuda nos rumannan tambe krese den nan bida spiritual, i ku Señor por trese harmonia i konsagrashon den tur kongregashon i uni nos den djE, trahando RUMBO PA KAS!